LETTRE DV CARDINAL MAZARIN,
escrite au Serenissime Archiduc Leopold.
MONSEIGNEVR,
I’esperois en suite du traité signé
par vostre Altesse Imperiale le 26. Decembre, qui
me fut rendu le second de ce mois & an present, par
le sieur Magineti porteur de la presente qu’elle seroit
au porte de sainct Germain en Laye, dés que le Roy
y seroit arriué : mais ie ne voy aucun effect du conuenu,
le desir extreme que i’ay de voir reüssir vn si
glorieux dessein pour sa maison, me sollicite incessamment
de la conjurer à ne point differer l’execution
de ces genereuses entreprises, si elle ne me veut
mettre dans l impuissance d’executer mes promesses,
ledit sieur Magineti (aux paroles duquel elle
donnera creance s’il luy plaist,) l’asseurera des bonnes
intentions que i’ay tousiours eu pour la maison
d’Austriche, que ma naissance m’oblige d’honorer
au dessus de toutes les couronnes de l’Vniuers. Et
l’affection que ie luy porte me presse de souhaiter
plustost la mort que de manquer aux occasions de
luy tesmoigner ce que ie luy suis. Et tres particulierement
à vostre Altesse Imperiale, l’obeissance veritable
que ie luy a voué en qualité de
MONSEIGNEVR,
Vostre tres humble & tres-obeissant
& tres fidel seruiteur,
IVLES CARDINAL.
De Sainct Germain en Laye
ce 14. Ianuier 1649.