Lettre de Monsieur de Sainct Chaumont Ambassadeur pour le
ROY, au Cardinal Antonio.
MONSEIGNEVR,
La des-obeissance que Vostre Eminence a rendu
aux cõmandemens du Roy, mon Maistre, a donné tant de
sujet à sa Majesté de ne vous en plus honnorer à l’aduenir,
qu’elle m’a ordonné de vous demander de sa part le breuet
qu’elle vous auoit cy-deuant accordé de Protecteur de ses
affaires en Cour de Rome & de faire sçauoir à V. E.
que saditte Majesté n’entend plus que ses armes paroissent
en aucun endroit de vostre maison puisqu’elle ne la
veut plus proteger, sans mon extreme indisposition, qui ne
me permets point de me leuer du lict, ie serois allé de viue
voix moy mesme faire ce discours à V. E. à ce defaut
i’ay recours à cet écrit signé de ma main, auquel ie vous supplie
de prendre toute creance, comme aussi à Monsieur du
Noyset, & à mon Fils le Marquis, & de bailler au sieur
Mathieu Secretaire de mon Ambassade, qui vous rendra
celle-cy de ma part, ledit breuet de protection, & ie resteray
comme ie dois !
MONSEIGNEVR,
De Rome ce 26. Octobre
1644.
Le tres humble, &
obejssant Seruiteur.