ne Ville de Parie. Ce qui nous estonne plus,
est que dans vne rencontre de cette importance,
il se trouue de mauuais esprits, lesquels abusans
du nom de nostre tres-cher, & tres-amé
Oncle le Duc d’Orleans, sont assez hardis pour
l’employer contre son intention, afin de haster
& fauoriser l’entrée & les progrez desdits Espagnols
dans la France. L’affection paternelle
que nous auons pour les peuples que Dieu a soumis
à nostre obeyssance, & le sensible regret
dont nous sommes touchez de les voir exposez
par ceux qui seroient plus obligez de trauailler
pour leur conseruation à la mercy des
forces estrangeres, que l’esperance du pillage
attire plus dans nostre Royaume en cette saison,
qu’aucun autre interest, nous oblige de
laisser en Guyenne nostre Cousin le Comte
d’Harcourt auec toutes les forces qu’il a commandées
iusques à present, pour continuer ce
qu’il a si heureusement commencé ; & en conseruant
nostre authorité, deliurer nos suiets de
ce pays-la des violances que ledit Prince leur
fait souffrir afin de retourne en diligence vers
nostre bonne ville de Paris, & garentir par
nostre presence, & mesme auec les forces qui
nous accompagnent, s’il en est besoin, tous
nos bons suiets, tant de ladite ville, que des
Prouinces voisines, des maux dont ils sont menacez
par le rauage des troupes estrangeres, &

page précédent(e)

page suivant(e)