auec le Froc, il en a voulu faire vn Vice roy
de Catalogne pour ramener l’Ancien Testament, &
adiouster vne feinte Royauté à vn déloyal Sacerdoce :
nous ne ferions que rire de tout cela si toutes les Tragedies
qu’il a faites n’auoient esté iouées à nos dépẽs,
marchand qui perd ne peut pas rire : toutes les belles
Machines qu’il fait construire par des Farceurs, ces
Scenes, ces Danses, ces Farces, ces dragées & limonades
peuuent auoir seruy de diuertissement à quelques-vns,
mais les moins stupides ont veu que ces
spectacles estoient funestes, & que nous les achetions
trop cher estant le prix, le salaire, la sueur, &
le sang de tant de suiets.

Il est vray aussi que s’il peut venir à bout de ses
desseins il nous fera voir d’estranges Comedies, ce
qu’il a fait n’est rien en esgard, à ce qu’il desire de
faire de Barbare, il deuient phrenetique, & apres
auoir voulu faire mourir de faim tout vn peuple,
il espere de r’entrer dans la ville pour la remplir de
meurtre, de sang & de carnage, de changer Paris en
vn desert, & de ny laisser rien que des Cimetieres.

C’est bien estre pire que Iulien l’Apostat, cét
Empereur a esté rendu infame pour auoir abandonné
la Religion Chrestienne qu’il auoit autresfois
professée, tandis que pour paruenir à l’Empire il