plus l’accuser des procedures qui seroient continuées contre
luy : il commença aussi à changer de parole ; disant à
ceux qui luy parloient de l’affaire de Monsieur le Mareschal
de la Mothe, qu’il estoit son amy & qu’il le vouloit seruir en
temps & lieu. Mais qu’il y alloit de l’honneur de la Reyne
Regente de faire auparauant cognoistre aux peuples ; que sa
Majesté auoit eu raison d’auoir fait arrester vn homme de
sa qualité & de ses seruices : qu’à cette cause, le Conseil du
Roy auoit esté d’auis de r’enuoyer le procés de Mon dit
Sieur le Mareschal au Parlement de Grenoble.

Le Cardinal & ses Partisans, ont si souuent repeté ce
discours, qu’il y alloit de l’honneur de la Reyne, de faire
poursuiure le procés de Monsieur le Mareschal de la Mothe :
qu’on est obligé de leur repliquer, qu’en cela ils estoiẽt
tres mauuais Politiques : & que les procedures qu’ils y ont
faictes, ont peut-estre plus terny la douceur du regne de la
Regence de cette bonne Princesse, qu’aucune autre action
qu’ils y ayent commise. Ils deuoient considerer, que l’histoire
marque auec plus de soing, les cheutes & les malheurs
des grands hommes, que toutes les autres affaires de
leur temps & que les Roys & bons Princes ne les ont iamais
poussez iusques à l’extremité, que sur des pretextes
specieux de crimes noirs & enormes de lacheté où de perfidie,
dont vne punition exemplaire estoit mesme demandee
par la voix publique. Et que si au contraire quelques Souuerains
ont poursuiuy leurs Illustres subjets, pour des causes
foibles comme sont les recherches d’argent ; qui est la
querelle d’Aleman, qu’on fait ordinairement à ceux qui
ont esté dãs des employs cõsiderables : la posterité a blasmé
ceux qui les ont poursuiuis, & n’en a pas diminué la gloire
des accusez. Le Tacite est plain de telles exemples, & nos
Annalles fournissent celles du grand Maistre de Montegu, de
L’amiral Chabot, des Mareschaux de Gyé, de Biez & de
Marillac. Il falloit que la passion du Cardinal fust bien aueuglée,
de vouloir acquerir cette haute reputation de douceur,
en commandant tant de procedures insolites contre