Auec l’Emprisonnement des personnes, les papiers furent
pris, & tous les biens saisis, scellez & annotés, & dés
l’instant le tout inuentorié ; en Catalogne par Monsieur de
Marca, & à Paris par Monsieur le Gras, & par Monsieur le
Lieutenant criminel. De plus Monsieur le Tellier au nom
du Roy, despescha auec grande actiuité & despense des
courriers dans toutes les banques de la Chrestienté, pour
sçauoir combien d’argent Monsieur le Mareschal de la Mothe
y auoit. Escriuit à Monsieur de Marca d’informer en
Catalogne contre ledit Seigneur Mareschal : & de faire saisir
& mettre entre les mains du Roy la Duché de Cardone,
duquel ledit Sieur ioüissoit paisiblement en ayant esté inuesty
par le feu Roy en recompense d’vne bataille gagnée.
Action cõtre le droict commun, qui deffend d’oster le bien
à vn accusé, auparauant la condemnation : contre les constitutions
de Catalogne, qui ne le permettent aux Princes
qu’aux seuls cas d’heresie où de leze Maiesté.

Monsieur de Marca, Visiteur & Intendant de Iustice en
Catalogne, suiuant les ordres de Monsieur le Tellier commencea
à informer, & enuoya incontinent en Cour l’enqueste
qu’il en auoit faicte : elle fut leuë de Monsieur le
Tellier qui la fist suprimer, voyant qu’elle pouuoit plus seruir
à canoniser ledit Seigneur Mareschal, qu’à luy faire son
procez. Il iugea par là, que ledit Sieur de Marca n’estoit
pas son homme, & qu’il en falloit trouuer quelque autre,
qui fust à tout faire. Il trouua qu’vn appellé Chirat, qu’il cognoissoit
pour auoir esté son Collegue au Chastelet y estoit
propre, il le choisit & l’enuoya en Catalogne auec d’amples
memoires pour esplucher entierement la vie de Monsieur le
Mareschal de la Mothe.

Et affin que le Sieur Chirat ne manquast pas de support
dans vn pays incognu où on l’enuoyoit : outre les lettres generales
que Monsieur le Tellier en escriuit aux personnes
publiques au nom du Roy ; Il escriuit particulierement à
Monsieur Chabot ennemy de Monsieur de la Mothe, à
Gourry son parent Intendant de l’armée, & au Sieur Saincte