pour lequel cas personne n’a iamais esté ainsi obserué
iusques là que Tacite s’estõne que Sejan Ministre de Tibere
ne s’agissant que de repetundis, au faict de Silius Amy de
Germanicus, fict au procez in quæstione Maiestatis. Cela
n’est point aussi l’vsage de France. Si Tabouret ou Catelan
estoient recherchez pour des millions entieres, dans vne
Chambre ardente de Iustice ; ils auroient encre & papier
& l’accez de leurs amis ne leur seroit pas refusé.

Monsieur le Cardinal ayant mis en seureté la personne
de Monsieur le Maresclal de la Mothe ; il restoit de trouuer
vn crime pour colorer la prison d’vn homme, qui retournoit
glorieux d’vn pays, qu’il auoit conserué à la France,
par sa conduite & par son espée : la calomnie des trois Catalans
desaduouée ne pouuoit plus seruir de pretexte, il y
failloit quelque crimes nouueaux. Surquoy son Eminence
s’aduisa de donner à Monsieur le Tellier la Commission
d’en chercher, c’est vn subiect qui auoit toutes les qualitez
qu’il faut pour le faire, il estoit ennemy declaré de Monsieur
de la Mothe, & il possedoit la charge de son parent &
amy, duquel il aprehendoit le retour ; de plus ayant esté
long-temps Procureur du Roy au Chastelet, il y auoit apris
toutes les ruses & chicanes imaginables à bien tourmenter
ceux, qu’ils entreprendroient.

La modestie deuoit empescher le Cardinal de donner
cette Commission à vn homme que le Mareschal de la Mothe
luy auoit escrit estre son ennemy, & la mesme modestie
deuoit empescher l’autre de l’accepter. Neantmoins il
le fit, & ioüant de l’espee à deux mains d’Ordonnateur &
de Secretaire d’Estat : Il a pratique des choses que la posterité
s’estonnera auoir esté faictes pendant la douceur du
regne de la Royne Regente.

Affin de ne manquer pas, il debuta en sa commission par
ordonner L’Emprisonnement de tous ceux qui auoient
approché Monsieur le Mareschal de la Mothe, où qui s’estoient
meslez de ses affaires iusques au nombre de 25. à
26. Sçauoir Monsieur de la Vallée homme du Roy, dans