forme de Manifeste, aux deputez du Principat de Catalogne
vne longue lettre, dans laquelle sa Maiesté representoit les
secours d’hommes & d’argent, qui leur auoient esté enuoyés
depuis sa Regence. Monsieur le Tellier, creature
de son Eminence, y fit l’addition d’vn petit discours où
commentaire, dans lequel il mettoit le detail des choses,
dont sa Majesté n’auoit parlé que generalement dans la lettre.
Il est vray que partie des hommes & de l’argent, dont y
est faicte mention a esté enuoyée ; Mais captieusement
Monsieur le Tellier n’y a pas exprimé le temps, d’autant que
cela eust fait cognoistre que tels secours estoient inutiles,
n’ayant esté enuoyés ; qu’apres les occasions perdues.

Quelque autre qu’vn Italiẽ se seroit cõtenté, que la Reyne
luy eust fait l’honneur de publier ce Manifeste pour sa iustification :
Le Cardinal veut passer plus outre, il veut poursuiure
iusques à la fin vn homme qu’il croit auoir offensé. Et
comme sa nation est industrieuse à chercher les moyens de
se vanger il en trouua vn par lequel il se persuada pouuoir
entierement ruiner Monsieur le Mareschal de la Mothe
ce fut par vne subornation, qui est la plus honteuse tentatiue
qui puisse tomber dans la pensée d’vn homme qui faict
profession d’honneur, voicy comment. Il y auoit à Paris vn
Moine appellé L’Abbé Sala eschappé des prisons de l’Inquisition
de Barcellonne, où il estoit detenu à cause de crimes
enormes, & postuloit à la Cour ce France par le moyen
de Monsieur le Tellier, que par l’authorité du Roy il peust
estre restabli en Catalogne & dans la iouyssance de son Abbaye.
Mondit sieur le Tellier, l’ayant recogneu pour vn esprit
hardy, capable de tout entreprendre contre Monsieur
le Mareschal de la Mothe le proposa à Monsieur le Cardinal
qui le iugea propre à sõ dessein, pour auquel paruenir & afin
de le mettre en quelque opinion de probité dãs l’esprit de la
Reyne, il fit encore que ce gallãt, quoy que suspẽdu & interdit
preschast deuant sa Maiesté en Castillan dans l’Eglise
des Feuillants. Il auoit auparauant gagné Puiolar lequel de
Miquelet où bandollier estoit deuenu agent de Catalogne.