auec desroute de ce lieu auantageux : dans lequel Monsieur de
Feuquieres auec l’auantgarde de l’Armée Françoise, eut ordre
de s’aller poster ; & le deffendit depuis contre le Duc Charles,
qui fit des efforts extraordinaires pour le reprendre. Apres cette
action si heureusement executée, monsieur de Longueuille
appella monsieur de la Mothe au corps de reserue, consistant
aux Regiment de Marsin & de Batilly ; auec lesquels il luy ordonna
de faire front à l’aisle gauche des ennemis, du coste de
laquelle il apprehendoit quelque notable irruption. Monsieur
de la Mothe la soustint iudicieusement, & la repoussa autant de
fois qu’elle voulut s’auancer, executant si ponctuellement les
ordres de monsieur de Longueuille, que du depuis il a esté honoré
de ce Prince d’vne tres-parfaite & particuliere amitié.

La reddition de la ville de Poligny fut le fruict de cette victoire :
apres laquelle monsieur de Longueuille donna les ordres à
monsieur de la Mothe de se saisir de la Vallée de Baume ; lieu de
difficile accez, & que les Comtois tenoient comme imprenable :
y ayant au fonds de ladite Vallée vne Abbaye, vn Fort, & vne
Tour bien flanquée : Pieces qui se ioignoiẽt par lignes de communication.
Monsieur de la Mothe apres auoir reconnu le tout,
l’attaqua par l’endroit que les ennemis tenoient le plus fort &
le moins accessible, & qui comme tel estoit le moins gardé ;
en sorte qu’estans inopinément surpris, ils furent poussez iusqu’à
la Tour, qu’ils rendirent à composition, auec de l’argent
qu’ils promirent & donnerent pour les frais de l’Armée.

Le Duc Charles ayant repris quelque cœur depuis sa desroute,
enuoya le Colonel Antorpe auec partie de son Armée attaquer
le chasteau de Vadans, qu’il emporta. En suitte il voulut
assieger celuy de Poligny, au secours duquel Mr de Longueuille
enuoya mr de la Mothe : Il le secourut en telle diligence, qu’à
son arriuée impreueuë, le Regiment de S. Mauris qui gardoit
les dehors lascha le pied, & fut deffait, & il entra dans la place.
Ce qui obligea les autres assiegeãs de songer à la retraitte : mais
mondit Sieur de la Mothe pour leur empescher, les attrapa à la
sortie de Poligny, les mit en fuitte, leur tua encor quatre cens
hommes, & prit quantité de prisonniers, entre lesquels se trouua
Antorpe leur Commandant, qu’il enuoya à Bellegarde.