ils n’en communiquerent rien à son Altesse Royalle,
à laquelle ils paroissoient ioints d’interest, & qui
leur auoit fait tant de graces & rendu de si bons offices,
Au contraire, ils luy protesterent auec serment,
estre eux mesmes surpris de ce changement, & n’en auoir
iamais eu aucune connoissance : Ainsi comparans les
soupçons de part & d’autre, nous verrons que ceux
qu’ils nous veulent donner de nos anciens amis, sont bien
moindres que ceux que nous pouuons prendre de leur
conduite. De confiance, nous n’en pouuons auoir du
tout, c’est bastir sur vn sable mouuant, & sur des esperances
incertaines.

Que peut on donc faire dans ce combat d’esprits, à
quoy peut on se resoudre. Cela n’est pas difficile, ils disent
tous qu’ils veulent faire le bien, Monsieur le Prince
n’a qu’a s’vnir pour cela. La diuision n’en est pas la marque,
il n’y a rien qui engendre l’amitié comme la conformité
des inclinations & des sentimens.

Ouy, mais ce bien ne se peut faire que dans les Conseils
du Roy, c’est le centre de la fortune publique, Monsieur
le Prince n’y peut trouuer de seureté.

En peut on imaginer d’autres que celles qui luy ont
esté desia baillees. La parole du Roy, de la Reyne, de
Monsieur le Duc d’Orleans, enregistrée au Parlement,
les Chambres assemblées.

Tout cela n’est rien dit on, Combien de fois a t’on
manqué à des parolles plus solemnelles, on se iouë tous
les iours des Ordonnances des trois Estats, & des Declarations
verifiées.

Cependant le peuple ny le Parlement, dont Monsieur
le Prince reconnoist mieux qu’il ne faisoit autrefois l’authorité,
ne luy peuuent pas faire donner d’autres asseurances.
Il ne demande pas pour ostages des places fortes
& des Gouuernemens de Prouince, il en a assez. Si on
manque à la parole, il peut attendre du Parlement & du
peuple, le mesme secours qu’il en a desia receu.

Mais il vaut bien mieux ne tenter point la fortune.