Gondi, Jean-François Paul / cardinal de Retz [?] [1649 [?]], A Nosseigneurs de Parlement. , françaisRéférence RIM : M1_2. Cote locale : D_1_15.
page précédent(e)

page suivant(e)

-- 3 --

procedures criminelles. Cependant tous les jours on faisoit
dire au Duc de Vandosme, & l’on publioit que dans peu l’on
connoistroit le sujet de cét emprisonnement, & que la Reine
ne voulant point d’Inquisition en France, ny permettre comme
durant le ministere precedent qu’on laissast languir les Sujets
du Roy dans les prisons, enuoyeroit dans peu l’affaire au
Parlement. Ces promesses & esperances de bonne & prompte
Iustice & la conduite qu’a tousiours apporté le Duc de Vandosme
aux choses qui pouuoient donner satisfaction à la Royne, le
rendit encores plus exact en celle-cy d’esclaircir les soupçons
de Sa Majesté, & luy fit retenir pres de luy & soigneusement
obseruer les Gentils-hommes & autres domestiques, tant ceux
employez à son seruice particulier, que ceux qui estoient aux
Ducs ses fils, afin que si sa Majesté en desiroit quelqu’vn il
se trouuast plus prest & en estat de respondre, & que l’on ne
peust pas imputer le defaut de preuues à l’euasion d’aucun de
ses domestiques. En cette grande sousmission ledit Duc de
Vandosme attendoit Iustice en repos & sous la foy Royale &
publique par le commandement de Sa Majesté dans sa maison
d’Anet, mais l’ennemy qui se declaroit contre luy ne se contentoit
pas de l’auoir reduit en cest estat, & l’auroit traité trop
doucement s’il luy eust donné lieu d’obeïr aux volontez de la
Reine, il trame artificieusement les moyens de le faire paroistre
ou rebelle, ou desobeïssant aux volontez de Sa Majeste qu’il
lui fait cacher, voicy auec quel stratageme il conduisit ses pratiques
Vne femme impudique fameuse sous les noms de la du
Breüil & depuis la du Bret apres auoir passé ses ieunes ans dans
les plus vilains lieux de Paris, est enuoyee à Anet pour y établir
comme elle fit, vn infame cõmerce dans vne maison proche du
Bourg, où par des filles qu’elle y fit venir, elle attire ceux qu’elle
peust débaucher & à iour nommé quinziesme Ianuier mil six
cens quarante quatre, tenant en sa maison les Sieurs de Ganseuille
& Sainct Philbert, elle donne entree à vne troupe nombreuse
d’Archers & assassins qui font main basse sur ceux qu’ils
trouuent en la maison d’où ils enleuent les Gentils hommes,
l’vn percé de vingt-cinq coups d’espée ou pistolets, l’autre presque
estranglé d’vne corde, & les conduisent à sa Bastille, escortez
de toute la Caualerie qui seruoit pres la personne du Roy.

 



page précédent(e)

page suivant(e)