DE PAR SON ALTESSE
Royale.

AVIOVRD’HVY deuxiéme du mois de Decembre 1651.
Monseigneur Fils de France, Oncle du Roy, Duc d’Orleans,
estant à Paris, voulant fauorablement traiter la Vefue I.
GVILLEMOT ; apres auoir esté particulierement informé de
sa capacité, & des soins qu’elle prend de faire fidellement &
correctement imprimer les Pieces, Ouurages & Relations qui
luy sont enuoyées pour son seruice. Son Altesse Royalle luy a
permis de porter la qualité de son Imprimeuse ordinaire. Veut
& ordonne qu’elle soit employée dans les Estats des Officiers
de sa Maison, & qu’elle joüisse des Honneurs, Priuileges, Franchises,
Libertez & Droits que ses autres Domestiques. Faisant
Son Altesse Royale defenses à tous Imprimeurs & autres, d’imprimer
ou contrefaire, & mettre au jour sous quelque pretexte
que ce puisse estre, les Relations, Pieces & autres Ouurages
d’Imprimerie, qu’elle fait ou pourra faire à l’aduenir pour le
seruice & par l’ordre de Son Altesse Royale, qui a pour témoignage
de cette sienne volonté signé le present Breuet, & commandé
estre contresigné par moy son Conseiller & Secretaire
de ses Commandemens, Maison & Finances.

Signé, GASTON.

Et plus bas,

DE FROMONT.