l’aueuglement des méchans & la seruitude des bons
qu’il donne aux innocens la grace des coupaples,
qu’il est prest de se confier entre leurs bras & les receuoir
en son sein, mais qu’il ne veut pas qu’ils soiẽt
redeuables du repos & du calme aux autheurs du
trouble & de la tempeste.

L’iniustice est percée de ses propres traits, ce
faux Orateur se confond par ses raisons ; pour
prouuer la iustice & l’ancienneté de la charge de
son Duc, il dit qu’elle est la continuation de celle
que le Roy mesme luy auoit donnée, qu’elle auoit
bien reçeu quelque surceance à la venuë de la Majorité,
Mais qu’elle pouuoit reuiure dans les occurences
Necessaires ? puis qu’à son adueu c’est vne
charge que le Roy donne, elle ne suit donc pas la
naissance & la qualité du Duc d’Orleans, & il ne
peut prendre de luy mesme ce qu’il tient de la liberalité
d’vn autre ; pour establir sa verité il se sert
d’vn terme faux quand il appelle Sursceance vne
pure suppression ; La Regence est du moins de
mesme nature que la Lieutenance generalle, &
peut aussi bien & plustost reuiure dans de certaines
necessitez ; Ce pendant on ne dit point qu’elle
soit surcise, elle est entierement éteinte dãs le Roy
Maieur, ces deux charges ont vne mesme naissance
& vn mesme tombeau, & sont comme ces rayõs
dispersez à l’aube du iour que le midy rejoint à leur
Soleil ; L’Aduocat a reconnu quelque chose de la
suppression de la Charge, en disant qu’elle peut reuiure
la seconde vie supposant de necessité vne premiere
mort : & ignoré la force des termes, & fait
vne alliance de contraires, en disant que ce qui est