lieu de choisir vn Vsurpateur, ils declarent prisonnier
le Maistre legitime : Si les effets des contraires
sont opposez aussi bien que leurs causes, le Roy
possedant son Royaume dans sa pretenduë prison,
le doit perdre dans la liberté qu’on luy presente.

A-t’on iamais veu vne pareille extrauagance, ils
ont esté les tesmoins oculaires des diuertissements,
des voyages & des exercices du Roy : Qu’ils nous
enseignent quel lieu enferme ce Thresor, quels
Gardes veillent à sa detention, ont-ils iamais remarqué
ceux du Cardinal à sa suitte ; S’il est libre, l’entreprise
de l’eslargir est inutile & ridicule ; & s’il est
prisonnier, ils se mocquent de luy de le prier de
chasser celuy qui le captiue : Que ce beau secret de
sortir de prison en commandant à son Geollier de
s’en esloigner n’estoit-il connu du temps de nos Peres,
il auroit espargné la rançon de François premier,
& la perte de ses Prouinces n’auroit pas balancé
le plaisir de sa liberté.

Si la prison de sa Maiesté est imaginaire, la Lieutenance
du Duc d’Orleans est la derniere temerité :
aussi le Parlement qui croit estre bien net quand
il s’est vn peu laué ; par vn equiuoque de Sophiste
a prié de la prendre, & ne l’a pas voulu donner.
Cette distinction a besoin d’interprete pour estre
entenduë : Car si la Lieutenance de l’Oncle est vn
larcin fait au Neueu, pourquoy le permettre, &
l’authoriser par Arrest ; & si elle est legitime,
pourquoy craindre de la donner, pourquoy tant
d’apprehension d’en laisser seulement la moindre
croyance dans les esprits, que la Cour non