La voix publique impute hautement au C. de
Retz, tous les desordres de la Monarchie ; & son
deffenseur pretend auoir droict de dementir cet
Oracle de la verité (c’est ainsi que i’appelle la voix
des peuples) par vn seul phantosme de vray semblance,
qui ne luy permet pas de soumettre son iument
à cette creance publique. Voila donc la voix
publique, & la vray semblance fondée sur le deuoir
d’vn particulier, en compromis ; Et voila vn
attentat tout extraordinaire à la verité, puis qu’on
pretend combattre les sentiments publics, par la
seulle apparence qu’on donne à vne creance opposée ;
& que pour donner vn démentir au iugement
de tous les sensez, ce qui ne se doit iamais impunement
que par l’euidence, on ne se sert neantmoins
point que des argumens dont on amuse ordinairement
les idiots.

Il peut estre vray (dit cet Autheur) que le Cardinal
de Retz a soustenu les interests du Mazarin ;
Mais il faut auoüer, conclut-il, que cela n’est pas
vray semblable Vn peu de reflection sur ce raisonnement
pretendu. Ce qui est vray semblable, n’est
vray semblable que par ce qu’on a quelque subiet
de croire qu’il peut estre veritable, & que les apparences
qu’on en voit, fondent assez raisonnablement
le subiet qu’on a de ne le mescroire point