de ceux qui les y voyoient entrer tous les iours :
Il est encor vray-semblable qu’ils estoient bien enflamez
de la charité du prochain, puis qu’il n’auoient
de richesses que pour en faire part à ceux que
l’indigence faisoit auoir recours à leurs liberalitez :
I’aduoüe qu’il estoit vray-semblable ; Mais cependant
il n’estoit pas vray : & le plus échauffé parmy
ces Messieurs, ne remporta des approches du
Sanctuaire, où il estoit venu famfaronner toutes
ces belles apparences de pieté ; qu’vn effroyable arrest
de reprobation.

Ie me crains bien, defenseur imprudent du Cardinal
de Rots, que vos vray semblables ne remportent
vn semblable succez de nos reflections ; &
que nous ne soyons obligez de vous confesser,
qu’en éblouïssant nos yeux vous auez éclairé nostre
esprit, pour considerer plus parfaictement auec
vous, que vous ne pouvez appuyer l’innocence
pretenduë de ce Prelat, que sur l’ignorance de ses
crimes ; & qu’en le defendant par la vray semblance,
vous le blasmez adroittement par le deffy de la
verité.

La vray semblance est, à la verité, ce que l’hypocrisie
est à la pieté : La verité & la pieté sont
sinceres ; La vray-semblance & l’hypocrisie sont
trompeuses : On peut dire des hypocrites qu’ils
sont gens de bien & on a subiet de le croire, parce
qu’on ne iuge de l’interieur que par le dehors ; On