PALLAS
POVR
LE ROY.

SONNET.

 

IE maintiens de mon Roy la supréme puissance
Son Trône est affermy par mes soins glorieux
Ce Prince nous fait voir dés sa plus tendre enfance
Qu’il veut marcher du pair auecque ses Ayeux.

 

 

Ie voy de ses vassaux l’estroitte obeïssance
On luy rend mesme honneur qu’on rend aux demy Dieux ;
Il ioint tant de vertus aux droits de la naissance
Qu’elles establiront son Empire en tous lieux.

 

 

Pour conquerir les cœurs ie sçay qu’il a des charmes
Ie sçay que les vertus seront les seules armes
Qui le vont mettre au rang des plus nobles vainqueurs.

 

 

Le plus farouche esprit que ce Prince captiue
Dit que seul il a l’art de soûmettre les cœurs
Sous vn joug qu’il parfume & fait de bois d’Oliue.

 

page précédent(e)

page suivant(e)