il faut auoüer que par vne espece d’enchantement inconçeuable
nostre Reyne Regente a esté circonuenuë
par les pernicieux conseils de ce mesme estranger, qui
croiant auoir esté outragé medite des vangeances horribles
contre la pauure France. Il me semble qu’il
deuroit estre satis fait de ce costé là, il a appellé des
barbares ou plustost des Demons pour estre les Ministres
de ses meschans desseins, qui ont commis des
cruautés inoüies cõtre des innocens, les vols ont êté les
moindres crimes qui ont suiui les violences & les sacrileges.
Cela est indigne du rang qu’il tient dãs l’Eglise,
& c’est contre des crimes de cette nature, que le Vatican
a accoustumé de lancer ses foudres. Il me souuient
d’vne belle pensée que sans doute ne desplaira pas à
Vostre Maiesté, elle vient de fort bon lieu, c’est de
Theodose second, qui interroge par ses confidens
pourquoy il ne faisoit point mourir de mort aucun
de ceux qui luy auoient faict quelque iniure.
Pleust a Dieu, dit il, que ie peusse ressusciter les morts.
Cette sentence Royalle deuroit estre escrite en lettre
d’or dans les cabinets de tous les Monarques, & certes
ie pourrois dire en cette conioncture ce que dit autrefois
vn bon Hermite à vn Empereur irrite contre les
habitans d’Antioche qui auoient renuerse la statuë
de sa femme Placilla, Qu’il n’est pas iuste de perdre & de
defaire tant d’images viuantes de Dieu pour vne statuë de bronze.

page précédent(e)

page suivant(e)