armes, & d’exposer vostre vie pour vn Royaume & pour
vne Couronne, dont vous tirez vostre auguste extraction.
Vostre experience & vostre âge dans lequel Dieu
choisissoit autresfois ses Prophetes, ne vous dispensent
pas de travailler : il faut que vous alliez trouver la Reyne,
& que vous paroissiez devant sa Maiesté, avec celle
qui decore naturellement vostre caducité : Il faut que
vous luy parliez avec l’authorité qu’vne inspiration divine
donne à des sages Vieillars, & comme celuy qui
ne doit plus rien desirer de la Cour terrienne, dont les
fausses faveurs empoisonnent le cœur des jeunes Princes,
enfin comme celuy qui a l’ame sur les lévres.

Representez à cette Princesse abusée, qu’elle est obligée
d’apporter vn prompt remede aux sanglans succez
d’vne prompte fureur, que l’on ne peut excuser ; & que
la lasche complaisance de quelques casuites, impies &
ambicieux, rend d’autant plus condamnable qu’elle est
dans leur approbation. Ces faux Prophetes d’vn autre
Sedecias, aiment mieux perir dans la licence de la Cour,
& la suivre dans son exil, que d’écouter les Oracles des
Hieremies : Ils periront comme Hananias, & i’entends
la voix de Dieu qui parle à la conscience criminelle de ce
Predicateur famelique, qui a osé dire à sa Majesté qu’elle
ne pechoit pas veniellement dans la poursuitte d’vn dessein
si pernicieux à sa religion, & à vn Estat tres-Chrétien :
Escoute miserable, le Seigneur ne t’a point envoyé, cependant
tu fais l’Apostre, & tu entretiens ceux de ton audience
dans leur aveuglement, & dans la pensée d’vne juste vengeance.
C’est pourquoy ie te dis de la part de Dieu, que tu ne jouyras pas
heureusement des dignitez que iubrigues par tes mensonges ; la
terre ne te retiendra pas long-temps, puisque tu as parle contre