futurs que i’ay acquise par les Astres, si ie
ne l’employois à consoler vostre vertu si iniustement
affligée. Ie ne sçay pas, Madame, quels
sentimens vostre grandeur à de l’Astrologie ;
mais ie ne puis m’imaginer qu’apres tant de malheurs
qui luy sont arriuez sans cause, elle puisse
douter de ces Celestes influences qui tombent indifferemment
dessus les Couronnes des Princes,
& sur les chaisnes des esclaues ; & qui entraisne
/> aussi bien l’innocent que le criminel au supplice.
Qui auroit crû, Madame, que Monsieur le Duc
de Beaufort, Prince dont la naissance & l’incomparable
vertu sembloient estre au dessus de la
Sphere de la Fortune, seroit au milieu de sa gloire
dans le plus haut poinct des faueurs de la Cour
arresté prisonnier, & miserablement conduit &
resserré dans le Bois de Vincennes : Quelle cause
peut-on trouuer à vn accident si funeste ; à quoy
peut-on attribuer vn malheur si estrange, si ce
n’est aux Planettes qui presidoient à sa Natiuité,
& qui marquent qu’au mesme iour qu’il fut arresté
prisonnier, son milieu du Ciel arriuoit au
quarré de Saturne, significateur des prisons, &
malheureusement situé dans son ascẽdant. Quand
vous auriez, Madame, (ce que ie ne croy pas) autant
de hayne & de mespris pour cette Diuine
science que Pic de la Mirandole, lequel en esprouua
les Presages à ses despens, & mourut le

page précédent(e)

page suivant(e)