Bourbon, Louis de [signé] [1651], LETTRE DE MONSIEVR LE PRINCE A MESSIEVRS DV PARLEMENT. , françaisRéférence RIM : M0_2028. Cote locale : B_7_12.
page précédent(e)

page suivant(e)

-- 4 --

Maison de sainct Maur, pour empescher que les
calomnies & les artifices de mes ennemis ne fissent
quelque impression sur vos esprits, si ie demeurois
dans le silence ; Ie vous diray donc,
MESSIEVRS, qu’apres que le grand nombre
d’aduis qui m’ont esté donnés des mauuais
desseins que l’on auoit contre moy, & des faux
bruits que l’on seme dans le public, pour rendre
ma conduite suspecte au Roy, & odieuse à tout
le monde ; ma contraint de m’abstenir de rendre
mes respects à Leurs Majestés, & d’assister en
leurs conseils aussi souuent que ie l’aurois souhaitté ;
& que j’ay attendu, comme chacun sçait,
la meilleure santé de Monsieur le Duc d’Orleans,
esperant que Son Altesse Royalle dissiperoit les
défiances que mes ennemis auroient pû donner
de moy à la Reyne, & rétablieroit enfin la confiance
& la réünion de la Maison Royalle tant
desirée, & si necessaire à l’Estat ; & que Son
Altesse Royalle & moy auons tousiours recherchée
depuis ma liberté, comme il estoit de nostre
deuoir ; Mais voyant que les soings de son
Altesse Royalle n’ont pû produire l’effect que
j’esperois d’vne entremise si considerable, outre
plusieurs aduis d’entreprise contre ma personne ;


page précédent(e)

page suivant(e)