craintiues. Vous serez semblable à vn grand
Mars, vous porterez comme vn autre Iupiter
le foudre en main, vous entreprendrez sur vos
ennemys, vous les rendrez au petit pied s’il
vous assaillent, vous departirez les charges de
la guerre aux vertueux & inuincibles, non tant
par le respect de la naissance qu’en consideration
de leur valeur : & comme ce mesme Empereur
ordonna des triomphes pour honorer
les victorieux, fit des Loix pour chastier honteusement
les puzilanimes ; de mesme Vostre
Majesté reconnoissant le merite & le laurier
pour freres, elle reputera l’offense & la peine
pour soeurs : c’est à dire, que vous aurez en vôtre
Royaume de la recompense pour les braues,
comme du chastiment pour les perfides &
laches.

Pour comble de benediction, vous ferez que
Dieu & les hommes seront tousiours tesmoins
de la Iustice de vos armes. Car pour conseruer
(disoit le grand Scipion) la paix dans vn Estat,
il ne faut rien faire d’injuste, ny rien souffrir de
honteux ; & parce que la victoire mesme des
guerres-ciuiles est dommageable aux Princes,
vous ne l’entreprendrez iamais que dans les extremitez,
& que l’honneur de Dieu & le salut
de vos Sujets opprimez ne vous y force plustost
que vostre interest particulier, ou quelque
boutee d’esprit qui ne soit prematuré.