& receus auec la satisfaction generale des Peuples, Presentent
auiourd’huy leurs tres-humbles Remonstrances
à Vostre Majesté, pour luy demander Iustice de la violence
qui les a fait supprimer comme des criminels, &
qui les a voulu immoler à la haine de quelques particuliers.

SIRE, ce n’est pas le motif de leur interest, ny le
ressentiment de leur propre mal, c’est le zele immuable
qu’ils ont tousiours eu pour le maintien de vostre Authorité
sacrée, pour l’obseruation des Loix & des Ordonnances
de l’Estat, pour le bien & soulagement de
vos Peuples, qui les ameine deuant le Thrône de Vôtre
Majesté, & qui les oblige à vous faire leurs tres-iustes supplications.
Veritablement s’ils n’estoient touchez que de
leur injure particuliere, ou si leur perte (comme on leur
veut faire croire) pouuoit affermir le repos public, ils seroient
demeurez dans vn silence perpetuel ; quelque grande
qu’eust esté leur douleur, leur patience l’auroit esté dauantage,
ils se seroient eux-mesmes deuoüez pour la tranquillité
de l’Estat, & la gloire de la victime n’eust pas esté
moindre que la ioye de ceux qui la vouloient sacrifier,
Mais à present qu’ils reconnoissent par le sentiment de toute
la France, & par les desirs de tous vos fideles seruiteurs,
qu’il n’y va pas moins de vostre authorité, & de la satisfaction
de vos bons Subjets, que de leur honneur & de leurs
fortunes, Le respect qui les eust rendu muets, les contraint
de parler, & ils croyroient auoir manqué au deuoir de leurs
charges, & violé la Religion de leur serment, s’ils ne vous
representoient les dangereuses consequences de leur suppression,
& les aduantages tres-éuidents que leur conseruation
apportera à vos affaires, & à vostre Prouince de Normandie.