Anonyme [1649], TRES-HVMBLE ET CHRESTIENNE REMONSTRANCE A LA REYNE REGENTE. Sur les mal-heurs presens de l’Estat. , françaisRéférence RIM : M0_3807. Cote locale : D_2_6.
page précédent(e)

page suivant(e)

-- 9 --

des bien-faits. Vous espargnerez le sang, & conseruerez la
vie & les biens à des millions de peuples, qui ne vous ont point
offensée ; Et comme à toute heure Dieu souffre les pecheurs
auec les Iustes qui le seruent, afin de leur donner du temps
pour demander misericorde : Comme il en differe la punition
de crainte que le mesme coup, dont sa main pourroit frapper
ses ennemis, ne blessast ses plus fidelles seruiteurs : Il ordonne
à vostre Majesté de faire difference entre les innocens & les
coulpables, si vostre Iustice en peut découurir ; Et il veut que
vous conseruiez la puissance & l’authorité qu’il vous a mis en
main. Mais sans ruïner la fortune & sans respandre le sang de
ceux qui ne l’ont point offensée, & qui iamais n’ont eu la pensée
d’en former le dessein.

 

DIEV qui au iour de sa Iustice demandera compte à tous
les Chrestiens des graces qu’il leur aura fait, & qui examinera
l’vsage & l’employ des biens, dont sa bonté nous aura esté si
liberalle, obligera vostre Majesté, à luy rendre raison du gouuernement
d’vn Estat qu’elle luy a confié ; & si au lieu de succez,
d’auantages, de la paix, & de la tranquilité, ses yeux ne
découurent que pertes, qu’vsures, qu’oppressions, que troubles,
que desordres, & que violences : Quel Arrest deuez vous
attendre de sa Iustice : n’aurez vous pas sujet de craindre son
Iugement, & vos mains non seulement vuides de graces & de
bien-faits, mais mesmes pleines de foudres & toutes teintes
dans le sang de tant d’innocens, pourront-elles attirer les misericordes
de celuy qui ne peut souffrir la vengeance, & qui aime
beaucoup mieux faire les mesmes faueurs aux criminels, dont
il oblige les Innocens & les Saincts, afin de moyenner vn delay
à la punition qu’ils meritent. Laissez à Dieu, MADAME, la vengeance
des injures que vostre Majesté croit estre faites à sa
personne & à son authorité, & il la fera si pleine & si entiere,



page précédent(e)

page suivant(e)