Tout de bon sans beaucoup de frime ;
Tesmoin du costé des marets
Alors que ces beaux marmousets,
Vouloient forcer nos barricades,
On leur enuoya des nazardes.
Pires que celles que chez nous
Nous enuoyoient quelques filoux,
Tu le sçais bien mon camarade
Cher Iodelet, quelle incartade
On a fait à toy & aux tiens
Ainsi que moy Comediens,
Et que la fortune contraire
Poursuit auec tant de colere,
Vous y perdez bien ô filoux !
Vous qui donniez de si bons coups
A ceux qui (d’vne humeur estrange]
Ne vouloient pas donner le lange,
Aussi leur estoit-il amert
De donner ce qui plus leur sert ;
Vous fanfarons pleins d’arrogance
Ny monstrez plus vostre vaillance,
Qui pour vn regard de trauers
Donniez de si vaillans reuers,
Qui n’estoient pas d’vne medaille,
Mais d’vn fer luisant qui de taille
Tous les endroits qu’il peut toucher,
A d’aucuns en à cousté cher
Puis qu’ils y ont perdu la vie,
Pour moy ie ne leur porte enuie.