vn grand discours sur la souplesse, & l’agilité du
corps humain, & sur le plaisir & le contentement
qu’il y a à danser sur la corde, pourtãt il ne se trouua
homme ny femme qui voulut apprendre ce
mestier : mais tout d’vn commun accord leur dirent
qu’elle deuoient apprendre ce mestier à leur
oncle, puis qu’il estoit plus digne de la corde que
personne qui fust en France ; elles mal satisfaites
d’vne telle response, s’en retournent toutes confuses
au fonds du theatre, d’où sortent en mesme
temps les Partisans habillez en arracheurs de
dents, ils parlent à merueille de l’industrie de leurs
mains, promettant de tirer toutes les dents de la
gorge d’vne personne sans luy faire du mal.

Ils font voir assez que le prouerbe est tres-veritable,
qu’ils sont semblables à ces arracheurs, &
ont coustume de mentir beaucoup plus que non
pas les derniers, qu’ils soient cent fois plus dommageables
aux subjets de la France que non pas
les autres, vne trop funeste experience nous le fait
cognoistre euidemment, les arracheurs de dents
nous peuuent empescher par nostre consentement
de manger du pain, & les autres nous le derobent ;
Ces bateleurs ne nous peuuent pas empescher de
boire, & les Partisans nous empeschent de boire
& de manger par leurs malefices & artifices, ils