LEGITIMATION DE MONSIEVR
le Duc de Vandosme.
HENRY PAR LA GRACE DE DIEV, ROY
DE FRANCE ET DE NAVARRE, A tous
presens & à venir, Salut : Nous estimons pouuoir
veritablement dire auoir autant que nul des Roys
nos predecesseurs, trauaillé pour la conseruation, le bien
& repos de cét Estat, lequel de desolé qu’il estoit & proche
d’vne quasi inesuitable ruine, quand il est tombé entre
nos mains, l’on a veû que nous l’auons releué, & par la
grace de Dieu tant est restably en son ancienne force & dignité,
n’ayant à ce espargné non seulement nostre labeur, mais
nostre sang & nostre vie, que nous auons souuent prodigalement
exposee aux occasions qui s’en sont offertes, tant que
nulle espece de peine & de peril ne nous a esté inexperimentée ;
& neantmoins auec tant de zele & d’affection enuers
cette Couronne que tout nous a esté facile & supportable :
ce qui nous a fait esperer que cette vertu & force sera hereditaire
à tous les nostres, & que tout ce qui prouiendra de
nous, naistra & croistra auec cette mesme intention enuers
cét Estat : c’est pourquoy nous auons d’autant plus desiré
d’auoir lignée, & en laisser apres nous en ce Royaume ; &
puis que Dieu n’a pas encore permis que nous en ayons en
legitime Mariage, pour estre la Reine nostre Espouse depuis
dix ans separée de nous, Nous auons voulu en attendant
qu’il nous veüille donner des Enfans qui puissent legitimement