Anonyme [1652], SECOND EXTRAICT DES REGISTRES DV PARLEMENT, CONTENANT Ce qui s’est passé pour l’esloignement du Cardinal Mazarin, par Messieurs les Deputez. Depuis le 25. Iuin, iusques au iour de leur retour de sainct Denys. , françaisRéférence RIM : M0_3608. Cote locale : B_12_49.
page précédent(e)

page suivant(e)

-- 3 --

DV MARDY VINGT-CINQVIESME
iour de Iuin mil six cens cinquante deux.

CE iour la Cour, toutes les Chambres assemblées, Monsieur
le Duc d’Orleans, & le Sieur Prince de Condé y
estans, ayant deliberé sur le recit fait presens les Gens
du Roy par Monsieur le President de Nesmond, Deputé
auec Monsieur le President de Longueil, & des Conseillers
de ladite Cour vers ledit Seigneur ; & sur l’Escrit contenant la volonté
de sa Majesté ; & Conclusions desdits Gens du Roy, estans
au Registre du vingtiesme de ce mois, & Declaration de ce iour
faite par ledit Sieur Duc d’Orleans, & ledit Sieur Prince, Que s’il
plaist au Roy d’esloigner le Cardinal Mazarin, suiuant la Declaration
de sa Majesté, ils poseront les armes, & executeront tous les
articles portez par ledit Escrit & Response donnée aux Deputez
de ladite Cour, & enuoyeront des Deputez pour conclure ce qui
restera à faire : A ARRESTÉ & ordonné, que lesdits Deputez retourneront
incessamment vers le Roy, luy porteront ladite Declaration,
qu’en éloignant ledit Cardinal suiuant la Declaration
de sa Majesté, ledit Sieur Duc d’Orleans, & ledit sieur Prince
poseront les armes, & executeront tous les articles portez par
l’Escrit & Response dudit Seigneur Roy, & qu’apres seront enuoyez
des Deputez par eux, pour conclure ce qui restera à faire
en suite de leursdites offres, & suiuant icelles.

Du Vendredy dix neufiesme Iuillet 1652.

CE iour la Cour, toutes les Chambres assemblées, Monsieur le
Duc d’Orleans Oncle du Roy, & le Sieur Prince de Condé
y estans, en presence de Beschefert Substitut pour le Procureur
General du Roy, Monsieur le President de Nesmond a dit ;
Que le vingt-septiesme Iuin dernier, Monsieur le President de
Longueil, & les Conseillers, & luy Deputez du Parlement, partirent
de Paris pour aller trouuer sa Majesté, la part ou elle seroit,
en execution de l’Arrest du 25. dudit mois, & ayant appris qu’elle
estoit à Melun, ils partirent pour y aller ; & sçachans sur le chemin
qu’elle en estoit partie le matin du mesme iour, ils furent à



page précédent(e)

page suivant(e)