Replique. La ville de Paris receut auec joye la
nouuelle de la sortie du Cardinal Mazarin, elle
est rauie de voir que par son propre faict il a facilité
sa perte, & que son esloignement volontaire
auoit preuenu les maux que son obstination eust
pû apporter : Mais cette joye estoit accompagnée
de crainte, se doutant bien qu’il ne s’estoit éloigné
que pour changer la conjoncture des affaires
& donner vne meilleure face à sa fortune : elle apprehendoit
que venant à reüssir dans ses desseins
il n’exerçast de cruelles vengeances contre ses
Habitans, elle craignoit que cette retraitte precipitée
ne fut suiuie de celle du Roy & de la Reyne,
comme elle fut, & qu’il ne fust sorty de Paris
que pour leur en monstrer l’exemple. Le Parlement
prit part à cette joye, il n’estoit pas encore
asseuré si cette seconde tentation pour le chasser
auroit son succez, la premiere n’ayant pas reüssi
laquelle luy donnoit vne ouuerture toute entiere
non seulement de l’exclure pour iamais des Conseils
du Roy, mais de le pousser hors du Royaume
sans esperance de retour, car iugeant qu’il
croiroit auoir satisfait à l’Arrest que de s’estre absenté
de la Cour & des Conseils du Roy pour
quelque temps, & son intention estant de deliurer
pour tousiours l’Estat de cét Estranger & malheureux
Ministre, le Parlement se resout de poursuiure
sa sortie hors du Royaume sans retour.