Cela estant, il est facile à voir que ses dons sont
tres-pernicieux, & que les sages ne receuront iamais
ses presens auec de telles conditions. Ie ne
m’estonne donc plus s’il n’y a que les incẽsés qui
fassent des vœux pour ces hautes fortunes, d’où
l’on ne tombe qu’auec grand bruit. C’est ainsi
que dans les fables celles de Phaeton & d’Icare
sont si connuës, aussi bien que celles dont nous
auons les recits veritables dans nos Histoires. Ie
pourrois aporter icy pour exemple le Sejan des
Romains : mais sans aller si loin, la France nous en
donne vn qui a beaucoup de rapport auec le Gauerston,
qui fut le fauory d’Edouard second, Roy
d’Angleterre. Comme ce lasche Gascon fut vn
flambeau funeste à cette Isle, Mazarin en est vn
à ce Royaume de France, durant la minorité d’vn
Roy, qui temoigne par ses vertus naissantes auoir
succedé à la pieté du feu Roy son Pere, d’heureuse
memoire, aussi bien qu’à sa couronne. Pour
faire voir le rapport qui se treuue entre ces deux
pernicieux esprits, qui sont nais pour estre la
honte de leurs Prouince, & la ruine des Estats, ie
veux faire en ce lieu le portraict du premier selon
la verité que i’ay pû apprendre en de vieilles
chroniques, & cette verité m’a esté depuis confirmée
par des personnes dignes de foy. De peur
qu’on ne me soupçonne d’auoir adiousté quelques