vous ceddera iamais en integrité, en l’amour de ses
Roys, au soulagement des peuples, ny en la sincerité
de ses actions, dans laquelle il perseuerera malgré la
vanité de tous vos efforts, qui plutost augmentent &
renforcent ses soins, ses veilles & glorieux trauaux
plus on pretend le persecuter & l’affoiblir : il a trop
de courage pour imiter vos laschetez & desseruir l’Estat
comme vous faites, en voulans débaucher par les
menaces d’interdit & de crime de leze Majesté, les
plus fidelles & incorruptibles seruiteurs du Roy. Ce
sera ce Parlement qui reduira vos pretentions en fumée,
& qui fera cognoistre à sa Majesté, qu’en cela
vous l’auez surprise, & que parmy vne Compagnie si
Auguste, elle verra tousiours son authorité Royale
maintenuë en sa force & vigueur.

Ce Ieudy 22. d’Aoust, Monsieur le Duc d’Orleans
& Monsieur le Prince, ont esté au Parlement les
Chambres Assemblées, à la Chambre des Comptes
& à la Cour des Aydes, où par vne briefue Harangue,
il a confirmé aux Compagnies, la Declaration, par laquelle
Son Altesse Royale & Messieurs les Princes,
promettent poser les armes, si tost que le Cardinal
Mazarin sera sorty du Royaume, & exhorté les mesmes
Compagnies de nommer des Deputez pour aller
remercier le Roy d’auoir éloigné le Cardinal, & supplier
sa Majesté de venir en sa bonne Ville de Paris.
Il a fait la mesme l’apresdisnée à l’Hostel de Ville, où
les six Corps des Marchands auoient esté mandez.

FIN.