Que les Roys ne doiuent auoir vne puissance absoluë, d’autant
qu’Elle degenere ordinairement en Tyrannie.

RESPONCE.

Comme la societé des hommes est le principal objet de la
Prouidence de Dieu, & que la chose la plus necessaire à sa
Conseruation, est l’establissement des Puissances, d’où despend
son gouuernement, il a fallu les establir selon la diuersité
du Genie des Nations & des Climats, & la forme de ce
gouuernement est ou Democratique, ou Aristocratique, ou
Monarchique, qui est à dire, Royal, lequel est le plus excellent
de tous, à cause de l’Vnité, & plus semblable à Dieu, qui
a voulu naistre du sang des Testes Couronnées, qui a promis à
Abraham par vne benediction singuliere, que des Roys naistront
de son sang, & qu’il est nommé Roy des Roys, pour monstrer
qu’il a vne puissance absolue sur toutes choses.

Les Souuerains qui portent dans la terre l’Image viuante de
ce diuin Original, dans le soin qu’ils prennent de gouuerner
les peuples, que Dieu leur a soûmis, seront ils differends du
patron sur lequel ils ont esté faits ? N’auront-ils pas aussi vne
puissance absoluë sur ceux qui leur doiuent obeïr, puis qu’il
est impossible de bien regir & gouuerner la Chose publique,
sans ce souuerain & absolu pouuoir ? Car s’il y auoit resistance
au Commandement, & en l’obeïssance Discernement, tout

page précédent(e)

page suivant(e)