leurs remonstrances accompagnees de leurs tres-humbles
supplications : & sur tous ceux qui
composent la Noblesse de vostre Royaume, ne
peuuent demeurer dans le silence sans encourir
le blasme d’vne lascheté aussi honteuse, comme
elle est contraire a leur naissance & à leur profession.

SIRE, On ne sçauroit presumer que ceux qui
sont preposez à l’éducation de Vostre Majesté,
ne luy ayent souuent dit qu’Elle ne tient son
Royaume que de Dieu & de l’espée de ses ancestres :
Qu’il a esté fondé & cimenté auec le
sang des premiers Nobles de cet Estat ; & que
leurs descendans, & ceux qui dans la suitte des
temps ont merite par leurs belles actions, d’estre
distinguez du vulgaire sont les veritables appuys
de cette Monarchie, & par consequent les
personnes les plus interessées en sa conseruation.

Ce n’est pas que par cette preéminence de la
Noblesse, nous pretendions obscurcir le merite
des autres Ordres : nous sçavons que les secours
& les contributions du Tiers Estat, sont des conditions
sans lesquelles tous les plus grands courages
ne pourroyent rien produire, & que le Clergé
attire par ses prieres & par le culte de la vraye Religion,
l’assistance & les benedictions du Ciel.

Mais, SIRE, la Noblesse de vostre Royaume