Anonyme [1650], REMONSTRANCES TRES-HVMBLES A LA REYNE MERE REGENTE EN FRANCE. POVR LA CONSERVATION DE l’Estat, pendant la minorité du Roy son Fils. , françaisRéférence RIM : M0_3343. Cote locale : B_4_24.
page précédent(e)

page suivant(e)

-- 5 --

enuers tous ses suiects tant grand, que petits, & punir
tres-griefuement ceux qui abusent de leur grandeur, au
prejudice des moindres : Seuerite qui le rendra grandement
aymable enuers tout le peuple : mais aussi pour recompense
de cette rigueur, il doit estre doux, affable, &
gratieux enuers ceux qui ont cét honneur de l’approcher.
Vn bon visage, vne accolade de nostre Roy, enuers les
Princes, grands Seigneurs & autres de quelque qualité
qu’ils soient, porte le plus du temps vn acquit general de
toutes les obligations qui’ls estimoient leur estre deuës
par luy.

 

Ces propositions bien mesnagées luy en produiront vne
autre non de moindre estoffe, qui est, que combien qu’il
soit tout puissant en son Royaume, & que la commune des
Courtisans estime sa volonté estre la loy, luy toutes fois iugera
par vn instinct de nature, que cela ne s’entend pas de
tout ce qu’il veut, ou peut, ains seulement de tout ce qu’il
doit iustement vouloir. Pource que la Loy doit estre faite,
à fin de rendre en sa perfection la chose pour laquelle elle
est bastie, & non pour assouuir vn appetit des-ordonné.
Le Roy doit mettre en cét en droit vne forte barriere contre
soy à son opinion, à ce qu’il ne couche en sa deuise, parce
que ie le veux, il est iuste : mais bien, ie le veux, d’autant
qu’il est iuste. Cette maxime formera en luy la Loy de la
raison non escrite en papier, ains emprainte dedans son
cœur, qui luy fera iour & nuict perpetuelle compagnie,
l’aduertira & parlera à luy en tout lieu, & temps, de quelle
façon il doit gouuerner auec vne prudence moderée ses
sujects. Tout Prince qui s’est laissé emporter à la mercy de
ses propres passions, ayant fait ce qu’il ne deuoit, il luy est
arriué ce qu’il n’a voulu : & sur tout il faut qu’il face ce perpetuel
iugement de ne separer les affaires d’Estat d’auec
celles de Dieu, qui doit estre la premiere & derniere bute
de ses actions,

De bonne heure on l’accoustumera d’auoir vn soin exact
& diligent des affaires, ausquelles on le dressera à mesure



page précédent(e)

page suivant(e)