vne si pesante Couronne, ny l’entendement suffisant
pour regir tant de peuples, cause que l’Empire a esté
diuisé en Oriental & Occidental, & qu’enfin il ne
reste plus qu’vn fort petit vestige de tels Empires.

Charlemagne ayant occupé celuy d’Occident, qui
n’estoit que d’vne partie de l’Europe, l’a neantmoins
diuisé en Vvestrich Royaume d’Occident, & Osterrich
royaume d’Orient vers le Danube, d’où vient
la maison d’Autriche ; pour monstrer que les grands
Estats sont difficilement tenus en leur entier, sous
l’authorité d’vn seul Prince. On void cette fameuse
republique de Venise se maintenir contre le plus puissant
Monarque de la terre, comme ils ont fait lors que
seuls ils ont resisté à Charlemagne, & arresté ses progrez.
Que Dieu mesme a preferé le gouuernement
des Iuges à celuy des Roys au I des Roys chap.
8. vers. 7. [Tous les plus anciens d’Israël s’assemblerent
& vinrent à Samuel & luy dirent, ordonne nous
vn Roy, & le Seigneur dit à Samuël, escoute la voix du
peuple : car ils ne t’ont pas debouté mais moy, afin que
ie ne regne sur eux.]

Mais qu’on ait cherché des Conseillers à Paris confidents
pour imiter la rebellion des Anglois, cela est
entierement hors de toute apparence, non seulement
à cause de la naturelle inclination que les François
ont d’estre gouuernez pas des Roys, mais aussi que
telle a tousiours esté leur coustume, qui est tournée
en necessité.

Il n’estoit point mal-aisé aux Anglois de secouër
le joug de leur Roy, puis que outre que la rebellion