On pourra icy examiner, sçauoir si le gouuernement
souuerain du peuple, qu’on dit Democratique ;
est meilleur & plus asseuré que celuy des principaux
d’vn Estat, dit Aristocratique, ou que celuy d’vn seul
Prince qu’on appelle Monarchique : Mais laissons
la question à decider à ceux qui en ont le choix, disons
toutefois que le plus ancien genre de gouuernement
a esté Monarchique, non seulement par
les Patriarches, i’entends Peres, & moderateurs des
puissantes familles ; mais aussi des plus grandes Prouinces
du monde. Nembrod le Geant a commencé
parmy les Chaldeens ou Assiriens, & au defaut
de successeurs dignes de l’Empire, il a esté transferé
au Persans, & des Persans aux Grecs sous Alexandre
le Grand : & d’Alexandre aux Romains, qui au
commencement estoient gouuernez par des Roys,
dont Romulus a esté le premier. Nous sçauons pareillement
qu’ils se sont reuoltez contre Tarquinius
le septiesme & dernier, à cause de son insupportable
superbe, & autres vices, & qu’ils se sont maintenus en
Republique, dont le peuple tenoit la souueraine
puissance ; neantmoins par le Conseil des Senateurs
principaux membres de leur Republique, les Consuls
executans leurs decrets & volonté au fait de la
guerre, & qu’ils se sont rendus maistres de l’vniuers
au delà des plus grands Monarques & Empereurs du
monde ; & qu’en fin ils sont retombez en Monarchie
sous Cesar ; mais aussi sçauons nous que tel Estat
n’a pas duré entier plus de quatre cens ans ; la teste
d’vn homme souuerain n’estant assez forte pour porter