Anonyme [1652], REMEDE AVX MAL-HEVRS DE L’ESTAT AV SVIET DE LA QVESTION. SI LA VOIX DV PEVPLE est la voix de Dieu. , françaisRéférence RIM : M0_3270. Cote locale : B_20_43.
page précédent(e)

page suivant(e)

-- 10 --

Roy nouuellement esleu. Autrement ses successeurs
& par consequent Louis 14. seroit vsurpateur, ce qui
ne se peut penser sans grand crime. Qu’on iuge
donc si la voix du peuple n’est point la voix de Dieu,
& s’il doit estre conduit comme vn aueugle en l’Estat
de France. Selon la mesme coustume, les Estats
deciderent le differend pour la Couronne en faueur
de Philippes de Valois, contre Edouard Roy d’Angleterre,
qui pretendoit auoir droict, à cause qu’il
auoit espousé Elisabeth de France, d’autant que la
Couronne ne tombe point en quenouïlle. Les Estats
Generaux s’assemblerẽt pour les affaires du Royaume,
sous le Roy Iean. Ils donnent la Regence à Louis
Duc d’Anjou premier Prince du sang, & non à Ieanne
Mere du Roy Charles 6. Mineur, comme par apres
aux Ducs de Bourgongne & de Berry, Oncles du
mesme Roy, lors qu’il tomba malheureusement en
frenaisie. Les Estats terminent le differend du Duc
d’Orleans, & du Comte de Beaujeu pour le fait de
la Regence sous Charles 8. Sacré que fut le Roy, il
assembla ses Estats à Tours, où fut estably vn Cõseil
de douze, pour expedier les affaires au nom du Roy.
En fin les troubles n’estoient appaisez que par les Estats :
à faute de quoy la France a esté pitoyablement
déchirée sous François 2. que sa mere Catherine de
Medecis ne voulut cõuoquer, crainte de perdre l’authorité
qu’elle auoit sur le Roy foible d’esprit & de
courage, auec ses fauoris. Henry 3. se sert des Estats
Generaux à Blois pour ruiner ses competiteurs. C’estoit
bien le remede, mais qu’il rechercha trop tard.


page précédent(e)

page suivant(e)