Qu’il aye à se trouuer le Mardy 22. d’Octobre
en son Chasteau du Louure, pour receuoir
& entendre ses volontez, sur toutes les
affaires presentes.

Aucuns de Messieurs se sont plaints de ce
que plusieurs d’entre eux auoient esté obmis
& ausquels l’on n’auoit pas escrit, qu’il sembloit
qu’il y eust du particulier ; que l’on vouloit
demeurer dans vne dissimulation trop
secrette pour leur jouër quelque piece dans
ce temps.

Il est arriué qu’vn particulier est entré dans
l’Assemblée, & a presenté vn gros pacquet,
lequel ayant esté déploye, il se seroit trouué
qu’il y auoit dans ledit pacquet six petits autres
pacquets.

Le premier pour Messieurs de la grand’Chambre.
Et les autres autres pour les cinq autres
Chambres des Enquestes du Parlement de
Paris, lesquels ayans esté aussi ouuerts, il s’y
est trouué [1 mot ill.] sieurs particularitez qui seroiẽt
trop prolixes à reciter.

Messieurs de Paris ayant sceu le iour pris
par sa Maiesté pour y reuenir, ils enuoyerẽt
par toutes les Parroisses & Eglises commander
de carillonner, ce qui a esté fait depuis les
trois heures de releuée, iusques à l’arriuée de
sa Maiesté en son Louure.