auec l’élite de la pluspart de ses
trouppes : Ces deux attaques données en
mesme temps & par deux endroits differends
embarasserent extremement les assiegez,
qui toutefois malgré la vigueur & l’opiniastreté
des assaillans, se defendirent vne
heure & demie que durerent les attaques, &
les forcerent de se retirer, apres auoir laissé
cent ou six vingts des leurs sur la place.

Cette perte n’ayant pû faire perdre aux
assiegeans l’enuie de faire quelque exploict
memorable, ils se resolurent à vne seconde
attaque qu’ils firent par les mesmes endroits,
s’estans renforcez de nouuelles troupes ;
mais pendant qu’ils se preparoient pour
cette attaque, ceux de dedans ayans donné
bon ordre à leur deffense, ils y profiterent
aussi peu qu’à la premiere fois, & se retirerent
en leur camp, auec perte d’enuiron cinquante
des leurs, & huict seulement de la
part des assiegez.

Messieurs de Tauanne & de Clinchamp,
voulans contraindre ceux du party contraire
de s’esloigner de la Ville ; proche de
laquelle ils commençoient déja à se retrancher,
resolurent de faire vne sortie sur eux