Anonyme [1652], RELATION DE TOVT CE QVI S’EST FAIT ET passé en la Deputation du Corps de la Milice de Paris. Et l’asseurance que le Roy a donnée de se rendre Lundy à Paris, auec toute la satisfaction qu’on a desirée de Sa Majesté. , françaisRéférence RIM : M0_3144. Cote locale : B_3_8.
page précédent(e)

page suivant(e)

-- 4 --

les voir en cette marche, & en suite ayant continué
de marcher jusques à la porte du Parc, ils furent receus
par le sieur de Saintot accompagné de quatre
Trompettes du Roy, qui s’estans mis à la teste, les
conduisirent dans la grande Place entre les deux
Chasteaux. Le Roy, la Reyne, Monsieur le Duc
d’Anjou & toute la Cour, s’estans mis sur le Balcon
du Chasteau pour les voir arriuer, ils passerent au
dessous dudit Balcon, & furent descendre au Chasteau
neuf, où apres auoir esté quelque temps pendant
lequel ledit sieur de Seue ayant demandé au
sieur de Saintot, si ayant à porter la parolle pour vn
Corps de Milice, il ne seroit pas entendu debout,
ledit sieur de Saintot respondit qu’il n’auoit receu
aucun ordre pour cela, & qu’il en pouuoit vser comme
il luy plairoit, ils furent introduits par ledit sieur
de Saintot & presentez à l’Audiance par Messieurs le
Mareschal de l’Hospital, & du Plessis Secretaire d’Estat,
dans la grande Salle du vieux Chasteau, où
estoient le Roy & la Reyne assis, Mr le Duc d’Anjou,
Mr le Chancellier à la main droite, Mr le Garde des
Sceaux à la gauche ; Messieurs les Mareschaux de Villeroy
& de l’Hospital, & autres Seigneurs & Officiers ;
ledit sieur de Seue apres auoir salüé sa Majesté, &
mis le genoüil jusques en terre, auec tous les Deputez,
fit debout son Discours en ces termes :

 

SIRE,

Si la voix de vostre ville de Paris n’auoit point
esté empeschée en la bouche de ceux qui en ont la
conduite, nous n’aurions pas entrepris de rompre l’ordre



page précédent(e)

page suivant(e)