voulu oster la liberté à la compagnie, Il à
encore insisté plus fortement ; Monsieur le
Prince de Conty repliquant, auroit dit que
Monsieur son Frere tesmoignoit assez par sa
conduite qu’il n’auoit point de mauuais desseins,
puis qu’il s’estoit addressé au Parlement,
& l’auoit informé des raisons qu’il
auoit eu de se retirer.

Surquoy Monsieur le Duc d’Orleans prenant
la parole, à rendu des tesmoignages tres
fauorables de Monsieur le Prince, & a dit
qu’il auoit des suiets de se deffier des creatures
du Cardinal Mazarin ; ayant conserué
leur credit à la Cour, & mesme y ayant aupres
du Roy qui luy parloient en faveur du
Cardinal Mazarin.

Ce differend a finy par vn compliment
que Monsieur le Prince de Conty a fait à la
compagnie ; qu’il sçauoit la consideration
qu’il en deuoit faire, les obligations que
Monsieur son Frere & luy luy auoient, qu’il
luy estoit bien dur d’entendre que l’on pust
presumer que la conduitte de Monsieur son
Frere engageat vne guerre Civille, qu’il n’auoit
pust empescher de releuer cette parole,
afin de soustenir sa reputation.