Anonyme [1649], RELATION DE CE QVI S’EST PASSÉ A PARIS, Depuis l’enleuement du Roy jusques à present. Enuoyée aux Prouinces. , françaisRéférence RIM : M0_3117. Cote locale : A_8_74.
page précédent(e)

page suivant(e)

-- 5 --

L’ordre des sceances & des emplois fust bien-tost reglé entr’eux,
& conclu sur le champ auec vn contentement incroyable de toutes
parts, & auec vn aplaudissement vniuersel de tous les ordres de cette
Ville. Monsieur le Duc de Longueville se resolut à demeurer auec
nous dans Paris pour assister Monsieur le Prince de Conty son beaufrere,
de ses conseils ; & quand il a esté aduerty de quelque faction du
Cardinal Mazarin dans son Gouuernement de Normandie, il nous a
laissé pour gage de son affection Messieurs ses enfans & Madame sa
femme qui est logée dans l’Hostel de Ville, où elle a accouché d’vn fils.
Et il est à present en Normandie, où par son arriuée il a étouffé entierement
les partys contraires, & a esté receu dans la Ville de Roüen, dans
le Chasteau & dans le Parlement, auec vne satisfaction incroyable de
tout le monde. La Noblesse y arriue de tous les endroits de cette Prouince ;
& il leue des troupes si considerables, que dans peu de iours
nous nous en pouuons promettre des effets aussi grands, que nos ennemis
en tesmoignent d’apprehension.

Monsieur le Prince de Conty fut declaré Generalissime, & comme
il a le courage & l’esprit aussi heroïque que sa naissance est illustre &
considerable, il a sujet d’esperer toutes sortes d’heureux succez de sa
conduite. Monsieur le Duc d’Elbeuf est General, & doit estre assisté
des Princes de Harcourt, Comte de Rieux & de l’Isle-Bonne ses fils,
qui ont leué des Regimens. Monsieur le Duc de Boüillon & Monsieur
le Mareschal de la Motthe-Houdancourt sont aussi Generaux, tout
le monde est assez informé de leur experience, par les grandes actions
qu’ils ont faites, & c’est assez de leur nom, pour faire connoistre leur
merite.

Apres eux est arriué Monsieur le Duc de Beaufort, qui a esté receu
Duc & Pair de France, & aussi declaré General ; si bien qu’il ne semble
rien à desirer en tous nos Chefs, soit de prudence, de valeur, ou de
qualité. Monsieur le Duc de Chevreuse, & Monsieur le Prince Palatin
fils du Roy de Boheme, sont venus faire offre de leur seruice au Parlement,
comme aussi Messieurs les Ducs de Brissac & de Luynes.

Nous ne pouuons obmettre les affections & les soins que Monsieur
le Coadiuteur en l’Archeuesché de Paris, a pris en toutes les occasions
qui se sont presentées. Ce qui a donné sujet au Parlement
de luy accorder sceance, & voix deliberatiue, par la bouche duquel
nous auons reçeu les asseurances de Monsieur le Duc de Rets son
frere.

L’Vniuersité & le Clergé de cette Ville, non seulement par leurs
contributions, mais par toutes autres voyes, ne cessent point de rendre
des tesmoignages de leur zele pour vne cause si iuste & si legitime.

Il seroit mal-aisé de nombrer la quantité de Mareschaux, de Mestres



page précédent(e)

page suivant(e)