Anonyme [1649], RELATION CVRIEVSE ET REMARQVABLE DE LA POMPE ROYALE DV IOVR DE LA SAINT LOVIS. Ensemble des Harangues & Ceremonies faites à nostre Dame: Et de tout ce qui s’est passé depuis l’heureuse arriuée du Roy iusques à present. , françaisRéférence RIM : M0_3103. Cote locale : A_8_2.
page précédent(e)

page suivant(e)

-- 6 --

l’ordre de le Reyne, par des plus grands Seigneurs du
Royaume, qui témoignerent vne grande affection pour
cette vertueuse Compagnie, qui agit perpetuellement
pour le repos public, & qui apporte tous ses soins pour
vne paix generale, qu’on espere bien tost ; puisque cette
glorieuse Princesse passionnée pour le repos du Royaume,
& poussée d’affection & d’vn zele charitable pour
ses suiets, fait tous les deuoirs d’vne bonne Reyne pour
cette precieuse pacification, & outre les Princes & Seigneurs
qu’elle employe, qui s’interesse en cette vnion
& reconciliation, elle importune encore le Ciel par ses
vœux & prieres, afin que viuants tous dans le repos &
dans vne societé Chrestienne & dans vn negoce fraternel,
le nom de Dieu soit loüé plus que iamais.

 

Le Vendredy suiuant, cette autre Auguste maiestueuse
& illustre Compagnie de Sorbonne, composée de
Docteurs & Bacheliers conduits par le Recteur de cette
Vniuersité & sacrée Faculté, allerent tous ensembles,
auec leurs longues robbes & fourures au Palais Cardinal,
où estans ils firent vne tres-docte & éloquente Harangue
digne de l’attention d’vn si grand Roy et d’vne si Religieuse
Princesse, ces vertueux et tres-celebres hommes
qui n’ont rien de commun auec les autres, pour leur
sainteté, pour leurs bons exemples, que pour la sublimité
et profondeur de la doctrine qu’ils professent, estans
des flambeaux qui éclairent toute la Chrestienté, et dissipent
toute la caliginosité et nuage des heresies, ils firent
à leurs Maiestez des submissions tres-respectueuses,



page précédent(e)

page suivant(e)