homme, & à mourir sur vn bois ignominieux.
Contemplant dis-je d’vn costé, la haute Majesté
diuine, & de l’autre l’indignité des hommes de le
tenir entre leurs mains, & le loger dans leurs corps,
transporté de cette estime & passion criminelle,
que le Diable dépeignoit des plus belles & plus esclatantes
couleurs de la charité ; Il s’esleue de terre
comme furibond, & d’vne voix entre-couppée de
despit, demande au Prestre quelle impudance il a,
d’oser toucher de ses mains le Corps sacré de nostre
Sauueur ; A peine les mots consecratifs auoient-ils
esté prononcés sur l’Hostie, que ce pauure malheureux
se jette au col du Prestre, le menace, & le
secoüe si rudement qu’il le terrasse, de bonne encontre
le bon Pere laissa tomber doucement la
saincte Hostie sur la table de l’Autel ; Et pour marque
& tesmoignage certain que ledit Religieux
n’auoit point d’intention de commettre vn sacrilege
sur le precieux Corps & Sang de nostre Sauueur,
c’est qu’il n’y toucha aucunement, comme
plusieurs malheureux ont fait, & entr’autres vn laquais
depuis peu le lendemain de la Pentecoste
dans l’Eglise du village de Sanois, à vne petite demy-lieuë
d’Argenteüil.

Tout au contraire, celui-cy ne s’attache qu’au
Prestre, l’accuse de trop de presomption & d’imprudence,
& est si aueuglé, qu’il croit rendre vn
grand seruice à Dieu en le tirant de la main d’vn
homme. Sa deuotion enragée, pour ainsi dire, n’en