Anonyme [1650], RECIT VERITABLE DE TOVT CE QVI S’EST FAIT ET PASSÉ A L’ENTREE DV ROY EN LA VILLE D’AVXERRE. AVEC LES HARANGVES faites à Leurs Majestez par Messieurs du Clergé de ladite ville. , françaisRéférence RIM : M0_3018. Cote locale : A_9_28.
page précédent(e)

page suivant(e)

-- 6 --

du Roy & aupres de Sa Majesté, vous n’auez rien
fait que suiure les pas & les vestiges du Roy deffunct
vostre tres-honoré Espoux ; aussi Dieu a-il despoüillé
les ennemis de cet Estat de plusieurs Prouinces, Villes &
Forteresses pendant vostre Regence, pour en reuestir le
Roy vostre tres-cher & honoré Fils pendant sa minorité.
Trois choses, MADAME, font que V. M. est
en grande veneration dans l’Eglise & dans les cœurs de
tous les bons François : La premiere est vostre pieté &
saincteté de vie, qui a commencé dez vostre bas aage,
qui continüe, & qui perseuerera iusqu’à la fin par la grace
de Dieu : La deuxiesme est la naissance du Roy & de
Monseigneur le Duc d’Anjou, Dieu a differé à vous les
donner pour faire connoistre à tout le monde que c’est
plutost vn ouurage de sa main & de vostre pieté, que de
la Nature : La troisiesme est vostre Regence heureuse &
sage conduitte ; c’est icy vne autre raison pour laquelle
Dieu a differé la naissance du Roy vostre tres-cher Fils,
sçauoir pour bailler la Regence & le gouuernement du
Roy & de son Estat à V. M. qui ne pouuoit estre entre
des mains plus sainctes & innocentes que les vostres, &
qui n’y pouuoit venir autrement. Vostre Majesté, MADAME,
ne s’estonnera point si l’Estat a esté esbranlé
pendant vostre Regence, ç’a esté pour vostre gloire, afin
de donner le moyen de donner deux fois au Roy vostre
Fils son Royaume, vne fois par sa Naissance, & l’autre
par vostre Regence, en luy conseruant dans les mouuemens
& troubles arriuez pendant sa minorité. Dieu a fait
passer par vostre Regence les plus grandes difficultez


page précédent(e)

page suivant(e)