de la Religion & de l’Estat : Nous ne sommes pas
non plus du nombre de ceux qui parlent de V. E.
comme d’vn estranger, nostre vie & nostre sang
nous sont estrangers en comparaison de la Religion,
dont vous composez la plus noble & eminente
partie. Que les malveillans en disent tout
ce qu’il leur plaira, Vostre Eminence a des tesmoignages
publics de sa suffisance, grand sens &
experience dans les affaires d’Estat, par le choix
qu’en a fait le Roy deffunct, le Cardinal de Richelieu
& la Reine Regente, & vos ennemis ont seruy
à sa gloire : plus ils ont voulu opprimer vostre Eminence,
plus elle s’est releuée, ainsi que fait la palme
lors qu’elle est foulée aux pieds. Deux choses
manquent à V. E. que le temps seul luy peut apporter :
la premiere est la bien veillance du Roy
pendant sa majorité, qui luy est toute asseurée :
l’autre est le sommet & le faiste de la dignité Apostolique,
afin de luy bailler moyen de faire connoistre
à toute la France par sa protection, & ses
benedictions Apostoliques, que V. E. a tousiours
eu le cœur François. Ce sont, MONSEIGNEVR,
les desirs de l’Eglise d’Auxerre, qu’elle accompagnera
de ses prieres pour la santé & prosperité de
vostre Eminence.

Son Eminence remercia la compagnie de son
affection, & de ce qu’elle auoit dit & parlé au Roy
pour la gloire & l’honneur de l’Eglise, pour laquelle