Anonyme [1649], QVESTION, SI LA VOIX DV PEVPLE EST LA VOIX DE DIEV ? , français, latinRéférence RIM : M0_2951. Cote locale : A_7_14.
page précédent(e)

page suivant(e)

-- 8 --

controuerse obligé de suiure : Mais ils se sousleuent quand il
contreuient en quelque façon aux loix de l’Estat, au dessus desquelles
la pluspart des hommes aduoüent que sa condition
l’esleue. S’il contreuient à quelque declaration faite en vn
temps où il estoit necessaire de la faire, ou s’il fait quelque chose
sans les formes prescrites par quelqu’vn de ses predecesseurs,
c’est vn tyran qui abuse de l’authorité Royale. Et on ne voit
pas que bien souuent ces declarations sont contraires à d’autres,
ou qu’elles ne sont pas bonnes dans le temps present, comme
elles estoient dans le passé. Que ceux mesmes qui murmurent
de l’infraction des Edicts, demandent la cassation d’autres
Edicts qui sont partis de la mesme source, c’est à dire de l’authorité
Royale, quoy que peut estre par des canaux differens :
Et que celuy qui regne n’est pas de pire condition que ceux
qui ont regné ; & a par consequent aussi bien qu’eux le droict
de faire des Ordonnances nouuelles, selon les occurrences
differentes, & d’interpreter les anciennes comme toutes celles
du Royaume, dont il est l’appuy & le soustien. Et non pas
les peuples, dont le zele indiscret ressemble à celuy de cet
Israëlite, qui s’imaginant que l’Arche d’Alliance alloit tomber,
s’auança, sans y estre appellé, pour la soustenir, & fut frappé
du feu celeste pour auoir témoigné cette défiance de son Dieu,
& osé mettre la main au Sanctuaire.

 

Oza. Paralip.
1. cap 3.

L’insolence des subjects contre leurs Souuerains n’est donc
point approuuée de Dieu : & par consequent lors que leur
voix s’éleue contre eux, ce ne sçauroit estre sa voix. Il a bien
dit : Ne vous fiez pas aux Princes, il n’y a point de salut auec eux :
mais il n’a iamais dit, Ne leur obeyssez pas ; au contraire, toute
l’Escriture ne presche rien tant que l’obeyssance, & la sousmission.
Le principal inseignemẽt que l’Apostre donne à Tite,
& ce qu’il luy recommande dauantage, c’est d’instruire les
peuples de Crete où il l’auoit laissé, d’estre sousmis en toutes choses
à leurs Seigneurs, de tascher de leur plaire en tout, & de ne les contredire
en rien, de ne les frauder point de leurs droicts, mais de leur garder
toute fidelité, afin qu’ils couronnent, & accomplissent la doctrine de
Dieu en tout. Obeyssez à vos Superieurs, dit-il aux Hebreux, &
soyez sousmis à eux : car ils doiuent rendre compte de vous. Aux Romains :
Que toute personne soit sousmise aux Puissances : car il n’y a



page précédent(e)

page suivant(e)