Anonyme [1649], QVESTION, SI LA VOIX DV PEVPLE EST LA VOIX DE DIEV ? , français, latinRéférence RIM : M0_2951. Cote locale : A_7_14.
page précédent(e)

page suivant(e)

-- 6 --

personnes priuées, ils paroissent tousiours criminels aux yeux
des peuples, qui se cõstituent pour Iuges de leurs actions, cõme
ils voyent que personne n’en a la charge, & sont ordinairemẽt
Iuges injustes & passionnez, qui ne pronõcent rien qu’en
tumulte, & qui n’executent leurs Arrests que par des seditions.

 

Dieu permet souuent que ces scandales publics arriuent pour
apprendre le deuoir aux Princes, & punir les subjects aussi bien
qu’eux : Mais malheur à ceux par qui ils arriuent. Si le Prince fait
mal de ne pas viure selon la loy de Dieu, & selon celle de son
Estat : le peuple d’vn autre costé fait mal d’en prendre connoissance,
& pis encore d’en entre prendre la punition. On voit
bien dans la Sagesse que, Iugement rigoureux sera fait de ceux qui
sont au dessus des antres : Mais ce iugement là n’appartient pas à
ceux qui sont au dessous d’eux, autrement ils changeroient de
condition. C’est pourquoy quand sainct Paul ordonne aux
Seigneurs de bien traiter leurs subjects, il ne les menace que
du tribunal de Dieu, les faisant souuenir qu’ils ont vn Seigneur
au Ciel qui a authorité sur eux de mesme qu’ils en ont sur leurs peuples.
La vengeance est à moy, dit le Seigneur, & c’est à moy à rendre à vn
chacun la recompense ou la punition qui luy est deüé. Ne vous en mettez
point en peine, ie la sçauray bien departir en temps & lieu. Et si toute
sorte de vengeance est à Dieu, que Dauid appelle le Dieu des
vengeances ou des chastimens ; il n’y a pas de doute que celuy
des actions des Roys luy est à plus forte raison particulieremẽt
attribué, comme au seul à qui ils doiuent rendre compte.

Væ homini,
per quem scãdalum
venit.
Matth. 18.

Iudicium durissimum
his,
qui præsunt,
fiet. Sap. 6.

Dominiquod
iustũ. est, &
æquum seruis
præstate, sciẽtes
quod &
vos Dominũ
habetis in cælo.
Coloss. 4.
Mea est vltio,
& ego retribuam
in tempore.
Deut.
32.

Deus vltionũ
Dominus.
Psal 93.

S’il est permis de porter la proportion que sainct Paul met
entre Dieu & les Rois, vn peu plus loin qu’il ne l’a portée, on
peut mesme soustenir que la sujetion des peuples enuers les
Rois, doit estre en quelque façon aueugle, aussi bien que la
sousmission des hommes enuers Dieu. En effet si nous voulions
examiner ce qui nous est proposé de la part de nos Superieurs,
selon nostre sens particulier, qui seroit bien souuent selon
nostre passion ; il arriueroit autant de desordre dans la police,
qu’il en arriueroit dans la Religion, si nous voulions examiner
les mysteres qui nous ont esté reuelez selon les fausses lumieres
de nostre raison ; & nous trouuerions des pretextes pour
n’obeïr iamais aussi facilement que de raisons pour ne rien
croire.



page précédent(e)

page suivant(e)