qui n’est pas capable de corruption, s’est renduë criminelle aupres
de ceux qui n’en sçauroient souffrir l’esclat, & qui ne demandent
que des complices & des muets pour excuter leurs
mauuais desseins, en opprimant les peuples, & ceux qui les protegent,
Et c’est pour cela qu’on vous a veu enleuer d’entre les
bras de Messieurs vos enfans pour vous releguer iniustement, &
vous enuoyer dans vn exil, qui est la moindre peine que puissent
attendre les autheurs d’vn conseil si funeste pour eux, & si
glorieux pour vous ; puis qu’il est si veritable que vostre probité
ne pouuoit estre reconnuë ny recompensée, qu’en faisant armer
toute la France pour la deffendre & pour la proteger ; ce qui
s’est fait si promptement & si glorieusement, qu’on peut dire
que c’est plustost vn coup du Ciel, que non pas vn ressentiment
des hommes, parce que ce miracle n’a point d’exemple, & que
les siecles à venir ne produiront iamais rien de semblable. Ce
tesmoignage singulier de l’affection veritable que l’on a pour
vous, & ce consentement vniuersel qui porte tous les François
à mourir plustost en vous conseruant, que de viure ou de languir
en vous perdant, fait bien voir que vostre probité n’est
pas commune : Et les preuues estonnantes qu’ils en laissent à
l’immortalité sont des marques bien certaines que vostre iustice
est plus qu’humaine, & que Dieu vous reserue à quelque
chose de plus grand encore parmy tant de merueilles. Estant
impossible de dire si vostre retour triomphant dedans Paris peut
estre estimé plus grand & plus superbe que la sortie violente &
precipitée qu’on vous en fit faire, parce que tant d’appareils &
tant d’acclamations n’estoient que le desadueu & la reparation
de l’iniustice qu’on vous auoit faite, & que vous auez veu vanger
si hautement & si solemnellement, puis que la douleur de vostre
esloignement a effacé la ioye & le contentement des victoires
& des conquestes que l’on celebroit si pompeusement. Les Ministres
& les Conseillers de tant de violences en quittant leurs
Hostels & leurs Palais dorez, auoient peine de trouuer de la
seureté pour leurs personnes attaquées entre les bras du Roy &
de la Reine Regente, pendant que vous esties porté sur les espaules
d’vn million d’hommes, & que vous ne pouuiez aborder
vostre maison à cause du grand monde qui vous accompagnoit,

page précédent(e)

page suivant(e)