Anonyme [1649], QVESTION, SI LA VOIX DV PEVPLE EST LA VOIX DE DIEV ? , français, latinRéférence RIM : M0_2951. Cote locale : C_6_76.
page précédent(e)

page suivant(e)

-- 15 --

par experience qu’il est bien plus aisé d’exciter des seditions,
que de les appaiser ; & que ce n’est pas sur la faueur de la populace
qu’ils doiuent chercher à s’appuyer, mais sur la solidité
du Throsne, sur lequel toute leur authorité est fondée, & qui
ne sçauroit tomber sans les entraisner auec luy dans sa cheute ;
n’estant à proprement parler qu’vne participation de la grandeur
des Roys, & qu’vn rayon de leur gloire : semblables par
consequent à ces astres qui se mettans entre la terre & le Soleil,
ne sçauroient le faire eclipser qu’ils ne perdent en mesme
temps toute la lumiere qu’il leur auoit communiquée, &
qu’ainsi ils ne paroissent à la terre encore moins lumineux que
celuy qu’ils veulent obscurcir ; & dépendant, pour mieux dire,
encore plus des Roys que les astres ne dépendent du Soleil,
qui ne les a point faits, mais qui a esté fait aussi bien qu’eux, &
qui n’a pardessus eux que l’auantage d’estre le premier, & le
plus grand luminaire. Au lieu que les Parlemens ont esté faits
par les Roys, pour rendre en leur nom la iustice à leurs subjets :
& ainsi ils ne peuuent auoir aucune authorité d’eux-mesmes,
comme les astres qui peuuent auoir quelque lumiere qui leur
soit propre, & par consequent dépendent d’eux bien plustost
de la maniere donc les Roys dépendent de Dieu, sans le concours,
& la continuelle conseruation dépendent duquel tous ses ouurages
retomberoient dans le neant dont il les a tirez.

 

C’est là le sort de ceux qui s’attaquent à leurs Princes. Mais
non seulement leurs maledictions retombent sur eux, elles attirent
aussi la male diction de Dieu, qui est bien plus dangereuse
que la leur. Tu ne diras iamais mal de ton Prince, est-il enioint
expressément dans l’Exode, comme le rapporte S. Paul.
Vous ne verrez pas le peuple impudent, dit le Prophete Isaye, vous
ne pourrez pas souffrir le peuple qui est haut en paroles, & dans le vain
discours duquel on ne comprend rien, pource qu’il n’a aucune sagesse. Sa
bouche est pleine de malediction & d’amertume, & sa langue est chargée
d’vn venin plus subtil que celuy des aspics. Sa voix n’a donc garde
d’estre la voix de Dieu, puis qu’elle est accompagnée de
tant de choses qu’il a en horreur. Mais s’il n’approuue pas que
le peuple leue la voix ny les armes contre ses Souuerains, quãd
mesmes ils seroient injustes & violens ; qui est ce que prouuent
les passages & les exemples de l’Escriture que j’ay alleguez : il



page précédent(e)

page suivant(e)